Ստամբուլյանի ընկերությունը Ստամբուլ ուղևորափոխադրումներ արե՛լ է․ պատգամավորը մոլորեցնում է

Ստամբուլյանի ընկերությունը Ստամբուլ ուղևորափոխադրումներ արե՛լ է․ պատգամավորը մոլորեցնում է


#CivilNetCheck

Ազգային ժողովի հունվարի 19-ի նիստին «Հայաստան» խմբակցության պատգամավոր Հռիփսիմե Ստամբուլյանը, անդրադառնալով «Լիցենզավորման մասին» օրենքում փոփոխություններ կատարելու մասին նախագծին, հիշատակեց «Ստամբուլ-Երևան» սպասվելիք թռիչքները և ակնարկեց, թե առաջարկող փոփոխություններն արվում են «կոնկրետ երկրի» համար։

Ի պատասխան մեղադրանքների՝ «Քաղաքացիական պայմանագիր» կուսակցության պատգամավոր ‎Հասմիկ Հակոբյանը հայտնեց, որ Ստամբուլյանի հիմնադրած «Անռիվա-Տուր» տուրիստական ընկերությունը տարիներ շարունակ դեպի Թուրքիա ուղևորափոխադրումներ է իրականացրել։

«Դուք չպետք է այդ թեմայից խոսեք, որովհետև տարիներ շարունակ գումար եք վաստակել մեր հայրենակիցներին դեպի Ատամբուլ տեղափոխելու արդյունքում»,- ասաց Հակոբյանը։‎

Մանիպուլյատիվ հերքում

Հռիփսիմե Ստամբուլյանը լրագրողների հետ ճեպազրույցում հայտնել է, որ իր ընկերությունը երբևէ դեպի Ստամբուլ թռիչք չի իրականացրել և միայն 2012-2013 թթ․ ավիատոմսի «ուղղակի գովազդ» է արել՝ Երևան-Ստամբուլ տոմսեր վաճառելով։

«‎Անռիվան երբևէ որևէ թռիչք դեպի Ստամբուլ չի իրականացրել [․․․]։ Ենթադրում եմ՝ կարդացել են 2012-2013 թթ. ավիատոմսի ուղղակի գովազդ։ Այսինքն, ընկերությունը հանդիսանալով տուրիստական ընկերություն, վաճառում էր ինչպես դեպի Մոսկվա, այնպես էլ դեպի Ստամբուլ տոմսեր։ Դա չի նշանակում, թե ընկերությունն իրականացնում էր դեպի Ստամբուլ թռիչքներ»‎,- հայտնեց Ստամբուլյանը՝ պնդելով, որ իրեն զրպարտել են։

Իսկապես, ըստ ընկերության կայքի և սոցիալական ցանցերում հրապարակված տվյալների՝ ընկերությունը հիմնադրման պահից տուրիստական գործունեություն է ծավալել, այլ ոչ թե ավիափոխադրողի, և միայն 2017-ին է դարձել եգիպտական AIR CAIRO ավիաընկերության պաշտոնական ներկայացուցիչը Հայաստանում։

Սակայն պատգամավորը չի հայտնում, որ իրեն պատկանող «Անռիվա-Տուր» ընկերությունը առնվազն 2014-ին կանոնավոր իրականացրել է ցամաքային ուղևորափոխադրումներ դեպի Թուրքիա և թռիչքներ կազմակերպել Վրաստանի տարածքով դեպի Անթալիա: Այս մասին տեղեկանում ենք ընկերության ֆեյսբուքյան պաշտոնական էջից։

Ստամբուլյանի ընկերությունը Ստամբուլ ուղևորափոխադրումներ արե՛լ է․ պատգամավորը մոլորեցնում է

Նկատենք, որ իշխանական պատգամավոր Հասմիկ Հակոբյանը խոսում էր հայաստանցիներին Ստամբուլ տեղափոխելու, այլ ոչ թե կոնկրետ ավիափոխադրումների մասին։
Բացի այդ, Ստամբուլյանին պատկանող մի ուրիշ ընկերություն՝ «Անռիվա-Տռանս»-ը, իրականացրել է նաև բեռնափոխադրումներ և պահեստային ծառայություններ Թուրքիայում։ Բեռնափոխադրումների ծառայության մասին վերջին հիշատակումը եղել է 2018-ի մարտին։

2018-ի օգոստոսին ընկերությունն իր ֆեյսբուքյան էջում հայտնել էր, որ սկբունքայնորեն չի վաճառում ուղևորատոմսեր դեպի Անթալիա։

CivilNet Check-ը կապ հաստատեց «Անռիվա-Տռանս»-ը ընկերության հետ և փորձեց պարզել՝ արդյոք ներկայում ընկերության միջոցով հնարավոր է բեռնափոխադրումներ կատարել դեպի Թուրքիա։ Ընկերությունից հայտնեցին, որ ներկայում փոխադրումներ կատարում են միայն ԵԱՏՄ և մի քանի այլ երկրներ, բայց օրինակ Թուրքիա և Վրաստան, չեն իրականացնում։

Փաստացի, Ստամբուլյանի հիմնադրած և ղեկավարած ընկերությունները վաճառել են դեպի Թուրքիա ավիատոմսեր, ինչպես նաև կազմակերպել օդային և ցամաքային ճանապարհով ուղևորների և բեռների փոխադրումներ, իսկ պատգամավորի հերքումները մոլորեցնող են։



Source link